खेडशिवापूर येथे वाहन पंक्चर झाल्याचे सांगून गुजरातच्या व्यापाऱ्याला ८ हजारांचा गंडा!
मंगेश पवार
खेड शिवापूर : पुणे-सातारा महामार्गावरील खेडशिवापूर गावच्या हद्दीत वाहनाचा टायर पंक्चर झाल्याचे सांगून गुजरातमधील एका व्यापाऱ्याची ८ हजार रुपयांची फसवणूक केल्याची घटना समोर आली आहे. याप्रकरणी राजगड पोलीस ठाण्यात चार अनोळखी इसमांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी डेनेश बिखाभाई भंडेरी (वय ३०, रा. कामरेज, जिल्हा सुरत, गुजरात) हे आपल्या GJ 05 JK 5337 क्रमांकाच्या वाहनातून प्रवास करत असताना १६ नोव्हेंबर २०२६ रोजी दुपारी दोन वाजण्याच्या सुमारास खेडशिवापूर गावच्या हद्दीत त्यांच्या वाहनाच्या पाठीमागून दुचाकीवरून आलेल्या दोन अनोळखी व्यक्तींनी हाताने इशारा करून गाडीचा मागील टायर पंक्चर असल्याचे सांगितले.
त्यानंतर फिर्यादी यांनी जवळील पंक्चर दुकानात वाहन नेले असता तेथे आणखी दोन अनोळखी इसम उपस्थित होते. त्यांनी वाहनाच्या दोन टायरमध्ये पंक्चर असल्याचे सांगून प्रत्येकी २,१०० रुपये किमतीच्या केमिकलच्या बाटल्या वापरण्याचे सांगितले. त्यानुसार चार केमिकलच्या बाटल्या टायरमध्ये टाकून फिर्यादी यांच्याकडून फोन-पेद्वारे ८ हजार रुपये स्वीकारण्यात आले. अशा प्रकारे चौघांनी संगनमत करून फसवणूक केल्याची फिर्याद दाखल करण्यात आली आहे.
या प्रकरणी राजगड पोलीस ठाण्यात गुन्हा रजिस्टर क्रमांक ४२५/२०२६, भारतीय न्याय संहिता कलम ३१८(४), ३(५) अन्वये १६ नोव्हेंबर रोजी सायंकाळी ५.३२ वाजता गुन्हा दाखल करण्यात आला आहे.
पुढील तपास राजगड पोलीस स्टेशनचे पोलीस निरीक्षक संतोष जाधव यांच्या मार्गदर्शनाखाली पोलीस हवालदार राणे करीत आहेत.

संपादक : मंगेश राजेंद्र पवार
